اكتشاف جديد يهزر العالم زراعة قرنية عين في الأسنان تعيد البصر لكفيف شاهد التفاصيل
التطور العلمى في الطب خاصة الجراحة وزراعة الأعضاء مثل زراعة قرنية العين من أهم العمليات التى لاقت رواجاً وأحدثت ضجة في عالم الطب وغيرت مسار حياة الكثير من الأشخاص وكانت سبب في شفاء الكثير وننقل لكم تفاصيل عن العملية على شكل حوار بين المريض والطبيب يكتبه لنا الدكتور سامح نبيل
زراعة قرنية العين في الإسنان
الدكتور : احنا هنخلع سنة من أسنانك الامامية .. ونزرعها في عينك علشان تشوف من تاني 😌😌
العيان : يعني هبقي شبه حمدي الميرغني ؟
الدكتور : بس هتشوف …
في واحدة من أغرب الحوارات اللي بتخيلها بين الدكتور والمريض !! فرضية ان الحوار دا حصل اصلا بتخليني اتنح كدا..
فكرة ان دكتور قدر يقنع مريض عنده انه يخلع سنة من أسنانة علشان يزرعها في عينة ويخليه يشوف ..والله بجد كان نفسي اقابل اللي قدر يعملها !!
والغرابة ان الموضوع دا محصلش مرة ولا اتنين ولا كدا .. دا حصل لعشرات الحالات في واحدة من أغرب عمليات الطب من وقت ما نزل سيدنا ادم علي الارض
تعالي نحكي الحكاية من اولها علشان تفهم ..
ربنا وهبنا نعمة غالية اوي اسمها القرنية .. ودي العدسة الشفافة اللي امام الجزء الملون في العين “اللي بيتعمل عليها الليزك”
القرنية شفافة .. وحساسة جداااااااااااااااااااااا
فلو حصلها التهابات او اي امراض بتبدأ تعتم وتزول شفافيتها ومع شدة المرض او طول مدة الضرر اللي حصل للقرنية بيفقد المريض امكانية الرؤية تماما
قبل ما يكون فيه اختراع عبقري اسمة زراعة القرنية علشان يرجع للناس نظرها تاني .. حصل ان دكتور عيون فكر في حاجة غريبة اوي .. انه يشيل القرنية ويزرع مكانها عدسة تانية زيها
سهلة اهي
بس الازمة كانت ان اي جسم غريب هتزرعه “العدسة” هيرفضه الجسم وهيعتبره عدو ويهاجمه ويدمره ويمكن العين كلها تدمر في الحرب دي
يبقي الحل اننا نحط العدسة دي من الاول جوا نسيج تاني حيوي .. بس مش واصل ليه دم ولا شرايين علشان خلايا المناعة في الدم ما تعرفش تهاجم .. سهلة اهي
ايه النسيج الحيوي اللي مش واصله دم ؟ عظم واسنان
وللأسف انت معندكش عضمة ممكن نشيلها ونستخدمها من غير ما تأثر علي حياتك .. فكان الاختيار الامثل هو الاسنان لاننا عندنا اسنان كتييير وعادي انت بتاكل في جمب واحد اصلا وتسيب الجمب التاني
بس لا بردو للأسف مينفعش ناخد ضرس 
الدكاترة في وقتها لقوا ان انسب سنان هما الاسنان العلوية الامامية “سنة حمدي الميرغني”
وتحديدا الجزء المدفون من السنة
فاللي كانوا بيعملوه كالتالي :
نجيب دكتور أسنان يخلعلنا سنة من الاسنان الاربعة الامامية العلوية
وبعد كدا ينضفها من اي خلية تانية غير تكلسات السنة نفسها “الجذور والاعصاب وخلافة
وبعد كدا يشيل الطبقة الخارجية كلها للسنة
ثم يخرمها بشينيور بوش الماني محترم “أكيد مش محتاج اقولك اني بهزر”
لا بجد والله بيخرمها من النص علشان يزرع جواها العدسة اللي هتكون بديل للقرنية
وبعد ما يزرع العدسة جواها
بيرجع تاني للعيان ويقوله افتح بقك كدا .. وياخدله بتاع 2 سم في 2 سم من نسيج mucosa اللي مغطي بق العيان من جوا
ويلف ال mucosa دي حوالين السنة
وينيم العيان في اوضة عمليات الرمد بقي يشيل القرنية ويزرع مكانها السنة دي
ويحقن كورتيزون جوا ال mucosa
مع العلم ان نسيج ال mucosa مليان اوعية دموية ومش شفاف اوي اصلا !!
يسيب العيان يستوي ست شهور .. وبعد الست شهور يكون الجسم استقر واتخدع ان السنة بتاعته وما بيهاجمهاش وميعرفش ان فيه خودعة جوا السنة دي “العدسة ”
المهم ان بعد ست شهور بتكون الامور استقرت ويدخل العيان مرة تانية اوضة العمليات علشان نشيل جزء من ال mucosa اللي مغطي علي العدسة
وهوب يشوف من تاني وتبقي الدنيا بمبي
خيال علمي بس قديم شوية
العملية اتعملت لعشرات العيانين زمان .. كنت اتمني احضرها بس للأسف اتطورنا وبقي فيه زراعة قرنية بقي وكدا
شوية ملحوظات غريبة بردو .. بعض العيانين كانوا بيستخدموا معاهم نسيج جلد عادي يلفوه علي السنة بدل ال mucosa ولك ان تتخيل عين مزروع فيها جلد !!
العملية اسمها osteo odonto keratoprothesis
مفيش مصادر البوست كله من تأليفي بس هتلاقي بعض المعلومات علي جوجل لو حبيت تقرا اكتر وهتلاقي فيديو للعملية علي اليوتيوب
اخر ملحوظة : انا اخر مرة قريت عنها كان من سنة ونص فوارد يكون فيه غلطة في البوست .. لو لقيت صححني او فوتها عادي احنا مش في مدرسة يعني 😂😂
